O Camiño en novembro, case un 15% máis peregrinos

Camino de Santiago

O mes de novembro concluíu e deixounos no Camiño de Santiago este ano 7.346 peregrinos, case un 15% máis que no mesmo mes de 2016, o que fai un total de 255.956 romeus que xa pasaron pola Oficina do Peregrino de Santiago, quen ofrece estes datos oficiais. En 2016, cando se marcou o récord anual absoluto de peregrinos desde que levan a cabo medicións, alcanzouse a cifra total de 277.854 camiñantes, un  tocho que todo apunta este ano non se poderá volver repetir, quedando unicamente o mes de decembro para pechar o ano.

A pesar da baixada habitual de peregrinos entre os meses de outubro e novembro, a caída foi moito menos pronunciada neste 2017, sendo ademais o mellor mes de novembro do últimos sete anos, tan só con novembro de 2010 marcando mellores rexistros (lembremos que foi cando se celebrou o último Ano Santo).

O 63% dos peregrinos (4.627) que chegaron a Santiago este mes de novembro son estranxeiros, superando aos nacionais, que apuntaron a un 37% do total (2.719), un dato que vén confirmar a popularidade do Camiño de Santiago fóra de España tamén fóra dos meses de tempada alta. Nos meses máis cálidos son os españois os que superan en número aos estranxeiros, aínda que cada vez por menor marxe. 

Outra información moi interesante extraída da Oficina do Peregrino en Santiago de Compostela revélanos que os peregrinos nacionais máis numerosos este mes foron os andaluces (18%), seguidos dos madrileños (15%), galegos (14%) e cataláns (12%). En canto aos estranxeiros, os alemáns (13%) foron os máis maioritarios, seguidos dos italianos (11%), coreanos (9%) e estadounidenses (9%). A gran maioría dos peregrinos que chegaron á Catedral de Santiago teñen idades comprendidas entre os 30 e os 60 anos (un 62% do total).