Con esta nova normativa da Xunta de Galicia permitirase unicamente a venda ambulante en eventos autorizados, como feiras ou eventos públicos
A venda ambulante ten os días contados no conxunto do Camiño de Santiago, fóra dos tramos urbanos; esta é a nova normativa que o goberno galego impulsará a través da Lei de Medidas Fiscais e Administrativas, tamén coñecida como lei de acompañamento do proxecto de orzamentos da Xunta para 2018. A Xunta dispuxo esta nova regulación, segundo comenta "por razóns de protección do patrimonio cultural" no ámbito do Camiño de Santiago.
O texto da nova normativa con todo, toma como excepción a venda ambulante no ámbito de eventos autorizados, como mercados, feiras, festas ou acontecementos populares. Todo apunta que esta norma chega para controlar a masificación de vendedores deste tipo en rutas tan elixidas polos peregrinos como o Camiño Francés, respondendo así á preocupación de varios consistorios galegos (algúns concellos xa regularan a venda ambulante con anterioridade, prohibíndoa).