Case 15.000 peregrinos percorreron o Camiño neste primeiro trimestre, superando as cifras obtidas en 2017
O récord histórico de peregrinos rexistrado o ano pasado pode ser superado neste 2018. En 2017 entregáronse 301.036 compostelas, aínda que este resultado vai camiño de ser superado este ano. Polo menos, así o indica o balance do primeiro trimestre, que mostra a entrega de 14.865 certificados no centro de acollida de cálea Carretas de Santiago de Compostela, superándose con fartura as 8.227 do mesmo período en 2017. Aínda que neste caso non se ten tanto en conta o factor engadido da Semana Santa xa que este ano foi moito máis madrugadora ao chegar en marzo, mentres que o ano pasado estas datas tan sinaladas coincidiron no mes de abril.
Aínda sen contar coa Semana Santa, a tendencia actual deste primeiro trimestre de 2018 apunta a outro récord. En xaneiro e febreiro deste ano tamén chegaron máis peregrinos, 1.628 e 2.181 respectivamente, mentres que o ano pasado foron 1.355 e 1.696 romeus. Ademais, o balance do primeiro trimestre tamén é notablemente superior ao do último Ano Santo, que tivo lugar en 2010. Naquel ano, no que tamén coincidiu a ponte de Semana Santa entre marzo e abril, rexistráronse un total de 8.710 romeus.
Ademais de aumentar o número de peregrinos, tamén se rexistrou unha maior porcentaxe de peregrinos de nacionalidade española en marzo cun total de 56,2% fronte ao 44,2% alcanzado durante o mesmo mes de 2017. Por outra banda, entre os estranxeiros notouse un incremento de estadounidenses, que ocupan xa o terceiro lugar, atopándose por detrás de portugueses e alemáns e sacando un pouco de vantaxe aos peregrinos irlandeses e italianos.