O obxectivo da Federación galega de saúde mental, entre outros, é trasladar á sociedade unha imaxe de normalización destas persoas e eliminar prexuízos
FEAFES, a Federación Galega pola Saúde Mental, organiza por sétimo ano consecutivo a actividade Peregrinos pola saúde mental, coa que como en cada ocasión búscase a participación de persoas con enfermidades mentais, pero tamén a dalgúns dos seus familiares, para percorrer o Camiño de Santiago durante algúns días. Nesta edición un grupo de 50 peregrinos percorrerán os últimos 28 quilómetros ata Santiago de Compostela desde a localidade do Pino, polo Camiño Francés.
Os máis de 50 peregrinos, que recibiron unha guía para ir perfectamente equipados e prepararse para a viaxe inician o seu Camiño este mesmo mércores 28 para chegar á praza do Obradoiro o venres 30 pola mañá, onde recibirán un certificado acreditando que completaron esa distancia. Os peregrinos cubrirán a distancia entre O Pino e Santiago polas mañás, mentres que deixarán as tardes para levar a cabo actividades lúdicas organizadas polas asociacións participantes na actividade e integrantes de FEAFES para socializarse.
Con Peregrinos pola saúde mental, ademais de buscar que as persoas con enfermidades mentais realicen exercicio físico, actividades de grupo e se socialicen, FEAFES busca lanzar unha mensaxe de normalidade á sociedade e eliminar os prexuízos e estigmas que existen fronte a eles.