ViveCamino

Rompendo barreiras de mobilidade no Camiño de Santiago cunha cadeira Joëlette

Unha asociación solidaria integrada por persoas con e sen discapacidade percorrerá o Camiño de Santiago cunha cadeira adaptada para explorar a natureza

A Asociación Montaña Para Todos percorrerá procedente de Canarias o Camiño de Santiago a partir do 10 de setembro e chegando a Compostela o venres 16. 11 membros desta asociación percorrerán as etapas finais do Camiño Portugués para cumprir un soño moi especial, o de Alberto, que padece ataxia, unha enfermidade neurodegenerativa que lle imposibilita camiñar e levar a cabo outras actividades. A expedición partirá da illa de Tenerife co obxectivo de cubrir os últimos 119 quilómetros que separan Tui de Santiago de Compostela, un reto co que Alberto comezou a "soñar" desde hai tempo: "sentín no meu interior 'o estar vivo', o poder realizar un reto para min imposible, xa que levalo a cabo sen este apoio sería inviable".

A que apoio refírese Alberto?Como romper as barreiras que lles exporá o Camiño de Santiago? Moi fácil, coa axuda dunha Joëlette, unha cadeira adaptada e deseñada para que persoas con mobilidade reducida poidan practicar o sendeirismo en calquera tipo de terreo. Estas cadeiras, coa que os membros da Asociación Montaña para Todos e Alberto percorrerán o Camiño desde Tui só necesita da axuda de dous acompañantes ou "pilotos" que non teñan dificultades para realizar sendeirismo (pero que non necesitan unha forma física especial). Cada un deles axudará ao ocupante da Joëlette tirando e empuxando da cadeira, que se apoia no chan por medio dunha roda ancha.

Desta maneira, coa iniciativa solidaria e sen ánimo de lucro de asociacións como esta, conséguese que persoas con discapacidade, que mesmo teñen problemas para saír de casa, poidan ter acceso a paraxes naturais como o que ofrece o Camiño de Santiago, un ben ao que todos deberiamos ter acceso. A Asociación Montaña Para Todos está formada por voluntarios que de forma desinteresada achegan o seu esforzo para que persoas con mobilidade reducida poidan ter acceso ao medio natural por medio do sendeirismo adaptado.