Máis de vinte convenios para promocionar o Camiño en todo o mundo

Camino de Santiago

A Sociedade Anónima de Xestión do Plan Xacobeo ou simplemente Plan Xacobeo, é o organismo encargado da xestión de toda a rede de albergues pública do Camiño de Santiago, do seu patrimonio e non menos importante, da coordinación de todas as actuacións relacionadas coa Ruta Xacobea, onde tamén entra a promoción da cultura xacobea por todo o mundo. Precisamente con este fin, a sociedade dependente de Turismo de Galicia asinou en 2016 máis de 20 convenios a nivel internacional con distintas asociacións do Camiño de Santiago repartidas polos cinco continentes, como así anunciou hai uns días.

A celebración de coloquios, exposicións ou edicións de revistas e material por parte destas asociacións está directamente relacionada con esta colaboración con Plan Xacobeo. Segundo afirma a sociedade, son máis de 300 colectivos en todo o mundo con casos como o de American Pilgrims on the Camino, de Estados Unidos, que ten ata 34 delegacións repartidas polos diferentes estados do país. O obxectivo de Turismo de Galicia e Plan Xacobeo é fomentar "todas as actividades dirixidas a divulgar e estudar aspectos relacionados co Camiño de Santiago e o fenómeno Xacobeo", unha tarefa que se torna máis importante se cabe neste período de transición entre dous anos xacobeos, dadas as altísimas expectativas de peregrinacións previstas para o próximo, en 2021.