Xunqueira de Ambía

Xunqueira de Ambía ©Panoramio / maiscargadadebombo

O devir histórico de Xunqueira dotouna de múltiples tesouros artísticos e culturais destacando de entre todos o antigo complexo monacal fundado no ano 955. Este conxunto converteu ao núcleo en precursor dos demais asentamentos monásticos desta zona ourensá.

O lugar inclúe un castro, o Palacio Prioral, a casa episcopal e outras dependencias que se atopan ao redor do patio interior. No século XII o mosteiro foi doado aos cóengos regulares de San Agustín, levantándose a igrexa de Santa María a Real dentro do estilo románico de transición.

No ano 1164 obtivo o rango de Colexiata. O templo, algo máis que unha igrexa no lugar, foi declarado monumento histórico nacional no ano 1931, de aí a importancia que lle conceden os habitantes deste concello ourensán. A igrexa románica, de falso triforio e planta basilical, conta na súa portada con tres arquivoltas con capiteis de follas, e cun claustro oxival, con arcadas de medio punto. Conta cun coro plateresco e púlpitos de pedra renacentista.

No conxunto sobresae tamén o órgano barroco, considerado como un dos mellores de Europa e o único de Galicia no seu xénero, polo que posúe un gran valor artístico. É un dos poucos órganos históricos que seguen en funcionamento. A súa historia remóntase ao século XVIII. O centenario instrumento consta de 1.702 tubos.

Foi realizado entre 1757 e 1758 en Santiago polo mestre Manuel González Maldonado. Este órgano é o terceiro que tivo o templo, pois están documentados un no século XVI e outro no XVII. Contemplado o belo conxunto, un paseo polas estreitas rúas de Xunqueira permitirá aos peregrinos admirar casas con brasóns e con diversas placas e inscricións, que recordan a diversas personalidades nacidas no lugar. Nunha delas, onde se pode ler «Castelo de Pousa.

Aº de 1356», naceu un de veciños máis coñecidos e que dá nome tamén a unha rúa. Trátase de Jorge Asdrúbal Ferreiro, piloto de profesión.

Praia fluvial

Durante o verán Xunqueira conta cun reclamo importante: unha praia fluvial. Situada a menos dun quilómetro os peregrinos deberán proseguir en descenso pola estrada OU-0102 para chegar a esta área recreativa, de verde dominante. O río Arnoia conta cun amplo caudal nesta zona. Piscinas municipais e área ao libre con mesas.