12 mulleres tratadas de cancro de mama percorrerán o Camiño de Santiago

Camino de Santiago

O Camiño de Santiago cada vez identifícase máis na nosa sociedade como un importante símbolo de superación e de convivencia, sendo elixido por persoas con todo tipo de historias detrás para vivir unha experiencia vital única. As últimas en emprender esta magnífica viaxe son 12 pacientes tratadas por cancro de mama do madrileño Hospital Universitario Infanta Leonor, que se lanzan desde este luns 19 de setembro a cubrir os últimos quilómetros da ruta xacobea desde a localidade galega de Vilalba.

O reto corresponde á terceira edición da iniciativa Camiño de esperanza, que comezou a súa andaina en 2012 con gran acollida e levará a estas mulleres ata Santiago de Compostela este 24 de setembro despois de percorrer 125 quilómetros. O obxectivo, crear unha intensa experiencia de convivencia entre estas pacientes para que poidan intercambiar as súas experiencias persoais e que o seu alento de esperanza chegue lonxe a outras mulleres na mesma situación. O cancro de mama non é impedimento para levar unha vida normal e activa, algo que estas mulleres queren demostrar camiñando a pé esta experiencia.

As 12 pacientes non camiñarán soas, e é que xunto a elas desprázase esta semana persoal sanitario entre o que atopamos profesionais como unha oncóloga, unha farmacéutica ou unha fisioterapeuta, todas elas relacionadas dalgunha maneira coa patoloxía. Ademais todo o grupo irá apoiado en todo momento por un microbús onde se tranportará equipaxe e material sanitario.