Belorado

Desde hai pouco abriuse un carreiro para subir ata o antigo castelo. Nesta construción defensiva, de orixe altomedieval, vixiábase o paso por este importante enclave estratéxico en épocas da Reconquista. Cando os reinos cristiáns lograron expulsar aos musulmáns e chegou a paz a estas terras, quedou en desuso.

Hoxe en día apenas queda en pé unha torre (crese que é a torre da homenaxe, a que en xeral albergaba as funcións máis importantes). O Concello habilitou paneis informativos. Desde o alto, as vistas da comarca e da serra da Demanda son únicas. As minas de manganeso de Puras de Villafranca son das máis antigas de España. Deixáronse de explotar en 1965. Están a cinco quilómetros de Belorado, en dirección Pradoluengo.

Visita no tren turístico e entrada ás minas, 6 euros. Máis información e reservas no 670 691 173 ou na oficina de Información e Turismo de Belorado. Existen visitas guiadas, de dúas horas de duración. Desde febreiro do 2013 está aberto o Museo de Radiotransmisión, moi relacionado co mundo bélico, emprazado nun antigo silo no interior dunha trincheira.

Desde un traxe de cosmonauta ruso ata equipos de radio empregados durante a Segunda Guerra Mundial. Só é posible visitalo mediante visita guiada. Pódese pedir información na oficina de Información e Turismo de Belorado. 5 euros. Descontos para peregrinos.

Belorado é a localidade máis importante de toda a Riojilla Burgalesa, nome co que se coñece ao espazo xeográfico comprendido entre a serra da Demanda e a fronteira coa comunidade autónoma da Rioxa. Os 22 concellos destas terras funcionan en réxime de mancomunidade. Belorado foi un importante enclave estratéxico. O seu nacemento tal e como se coñece hoxe día está moi relacionado cun castelo altomedieval que controlaba o paso do val do Ebro á Meseta durante a Reconquista.

Este núcleo foi o primeiro lugar de España no que se celebrou unha feira. Foi no ano 1116, grazas ao foro (privilexio) concedido polo monarca Alfonso I de Aragón. Na década dos oitenta Belorado foi unha importante vila especializada en peles. Disto apenas quedan un par de fábricas, aínda que se pode apreciar o seu glorioso pasado peleteiro na multitude de carteis que aínda colgan das fachadas.