Cee

Cee ©Panoramio titocives

O percorrido urbano polo núcleo de Cee conduce ao peregrino ata a igrexa de Santa María da Xunqueira, un templo que a pesar das desfeitas cometidas durante a invasión napoleónica, conserva a súa cabeceira gótica. Foi levantado no século XV baixo as ordes de Domingo de Andrade, excepcional arquitecto oriúndo da poboación e a quen tamén se debe, entre outras obras, a Torre do reloxo da catedral de Santiago.

Segundo a tradición a igrexa levantouse no lugar onde apareceu unha imaxe da Virxe no medio duns xuncos. Como outro dos principais atractivos de Cee áchase o legado de Fernando Blanco de Lema, o seu principal benefactor. Nacido no lugar en 1796, emigrou a Cuba moi nova, onde fixo gran fortuna. Parte dela doouna á construción dun colexio na súa localidade natal, un inmoble que aínda é, hoxe en día, o referente cultural da vila: o museo-Fundación Fernando Blanco.

A maior parte da colección consiste no instrumental científico e no material didáctico das cátedras, laboratorios e gabinetes do antigo instituto. Nel consérvanse, por exemplo, balanzas, microscopios ou telescopios do século XIX. Xunto a iso, tamén alberga mostras de animais, minerais e fósiles así como instrumentos musicais antigos ou distintos fondos artísticos e pictóricos.

A fundación está emprazada na Praza da Constitución. Abre de martes a sábado, de 10.00 a 13.00 e de 17.00 a 19.00 horas. Máis información na súa web. Este insigne veciño, Fernando Blanco, pervive na memoria dos seus veciños grazas á estatua da súa figura na avenida que leva o seu nome e a un instituto tamén bautizado cos seus apelidos.

Cerca do museo atópase o Paseo da Alameda, un dos lugares máis agradables para pasear, ao acoller emblemáticos e tradicionais edificios do século XIX -como a Casa Mayán- con galerías e balcóns. Ademais, os peregrinos que se mergullen no casco antigo de Cee, pasearán por estreitas ruelas adornadas con fontes milenarias e casas blasonadas, como o Pazo de Cotón.

Celebracións Cee acolle durante o verán as súas principais celebracións. Os peregrinos que cheguen a mediados de xullo á localidade poderán tomar parte nas festas de San Cristovo mentres que aqueles que arriben ao enclave a mediados de agosto asistirán ás da Virxe da Xunqueira, as principais da poboación. Con elas réndese honra á patroa, a Virxe da Xunqueira, cunha emotiva procesión. Pero os festexos relixiosos combínanse durante varios días cun amplo programa lúdico, cheo de música, oferta gastronómica e atraccións.