O Porriño

Capela das Angustias, no Camiño ao seu paso por por O Porriño

Na actualidade a clave do seu crecemento é a industria, da man dos dous grandes polígonos industriais que serven ao municipio e a Vigo. De entre todos os sectores destaca o granito, xa que no municipio se atopa o principal xacemento deste material en España.

De feito, dá incluso nome a unha variedade específica, coñecido como Rosa Porriño. A pesar da súa modernidade, aínda conta co encanto antigo da man das construcións do arquitecto local Antonio Palacios, un dos seus veciños máis ilustres, e das casas blasonadas e con soportais no casco antigo.

Se o visitante pode elixir data, sen dúbida debería facer coincidir o seu traxecto coa celebración do popular e famoso Festival de curtos de Cans. A cita celébrase todos os meses de maio coincidindo co certame francés de Cannes. Precisamente a coincidencia no nome foi a orixe do festival, que leva o glamour ao rural galego con proxeccións en galpóns, transporte en tractores, concertos en galiñeiros e unha infinidade de curiosidades.

Os famosos xa se renderon á cita e cada ano chegan directores ou actores de renome invitados ao evento, que supera as 10.000 visitas durante a celebración na pequena parroquia.