Palas de Rei

Palas de Rei ©Panoramio delfineiras

Algo afastado do núcleo urbano e do Camiño de Santiago, a visita máis recomendada en Palas de Reis é a do Castelo de Pambre. Foi construído por Gonzalo Ozores de Ulloa sobre o 1375 a beiras do río que lle dá nome por Gonzalo.

Durante varios anos foi o escenario das loitas de poder entre Pedro I e Enrique de Trastamara e da nobreza local fronte ao arzobispo Fonseca, de Santiago de Compostela. Pasou de mans dos Ulloa aos Condes de Monterrei, chegou á casa de Alba, vendido por 27.000 pesetas a un veciño de Palas, hoxe é propiedade da Xunta de Galicia.

É a mellor mostra da arquitectura militar medieval de Galicia, xa que, coas súas deficiencias, se conserva en bo estado. É un dos tres castelos que quedaron en pé en Galicia tralas revoltas irmandiñas da segunda metade do XV. Varios sectores oprimidos da poboación galega da época, desde o campesinado ata a baixa nobreza, atacaron aos señores feudais polos abusos aos que eran sometidos.

O castelo de Pambre é de planta cadrada. En cada unha das súas catro esquinas levántase unha torre. No interior atópase a torre da homenaxe, de maior tamaño e altura que o resto. Dentro das murallas tamén está a capela de San Roque, que se empregou ata fai non moito como igrexa parroquial. Para acceder hai que saír do núcleo de Palas pola C-547 en dirección Santiago e tomar un cruzamento á esquerda, seguindo a LU-40-08 ao redor de 4 km. As portas do recinto están abertas de martes a domingo de 11.00 a 14.00 e de 16.00 a 19.00. A entrada é gratuíta. No inverno redúcense algo os horarios, pero os desta tempada aínda non están definidos.

Vilar de Doas O outro monumento do Concello que pode facer sombra ao poderoso Castelo de Pambre é a Igrexa de Vilar de Doas. Aínda que o Camiño de Santiago non toca a igrexa monástica de Vilar de Doas, a súa evolución está totalmente ligada á ruta. En 1931 foi recoñecida como monumento nacional. No seu día funcionou como un dos principais centros de operacións dos cabaleiros da Orde de Santiago, quen á súa morte eran enterrados no lugar.

No verán unha guía realiza visitas guiadas de forma gratuíta. En tempada baixa permanece pechada, pero Jesús, o sacristán, estará encantado de abrir o templo a todos aqueles que o desexen. Para contactar con el: ( 34)982 153 833 | ( 34)669 544 009. Aclarará as dúbidas dos peregrinos máis curiosos. Non deixen de preguntar polas súas excepcionais pinturas góticas.