Camiño de San Salvador: Así é a ruta que une León con Oviedo

Camino San Salvador

Camiño de San Salvador: Unha ruta cun simbolismo moi especial

"Quen vai a Santiago e non vai ao Salvador, honra ao criado e deixa ao Señor". Seguramente xa oíses antes este antigo refrán (que menciona a Santiago e ao propio Xesucristo) pero poida que o que non saibas é que está vinculado ao Camiño de San Salvador, unha ruta con orixes medievais. Este  antiquísimo camiño xorde do costume dalgúns peregrinos medievais de desviarse da súa peregrinación a Santiago de Compostela (ben á ida ou ben á volta) para visitar a Catedral de San Salvador, en Oviedo.

Tanto peregrinos que percorrían o Camiño do Norte como aqueles que camiñaban a ruta francesa tomaban a decisión de achegarse a Oviedo para contemplar por si mesmos as reliquias de gran valor da Cámara Santa, construída para salvagardar os máis importantes tesouros catedralicios. Desta forma, nos tempos nos que gran parte da Península Ibérica estaba controla polos musulmáns, Oviedo converteuse en todo un núcleo de peregrinación cristián.

Cinco etapas por terreo montañoso e paisaxes impresionantes

Precisamente do desvío que tomaban os peregrinos que percorrían a meseta en León para chegar ata Oviedo, cruzando o Porto de  Pajares, nace o Camiño de San Salvador, unha alternativa ao Camiño de Santiago e de maior dificultade mesmo que outras rutas xacobeas como o Camiño Primitivo.

Unha vez en Oviedo, se se quere continuar camiñando ata Santiago de Compostela, pódese tomar o Camiño Primitivo, que transcorre polo interior ou o Camiño do Norte, que o fai pola costa.

O Camiño de San Salvador consta de 5 esixentes etapas e un 130 km de traxecto e aínda que se trate dunha ruta moi pouco transitada polos peregrinos na actualidade, é unha das máis especiais, polo seu simbolismo e as paisaxes que nos ofrece. A pesar de non poder competir en popularidade coas rutas a Santiago, o Camiño do Salvador atópase ben sinalizado e conta con albergues para dar acubillo aos peregrinos que o percorran. Unha notable parte do seu percorrido transcorre a través de montaña, polo que hai que ir ben preparado, preferiblemente con experiencia previa neste tipo de rutas.

O Camiño de San Salvador ten a particularidade de contar coa súa propia credencial de peregrino que haberemos de ir selando e un certificado -a  salvadorana- que se nos outorga ao finalizar a ruta, similar á  compostela. A  salvadorana pódese obter na catedral de Oviedo ou no albergue da Asociación  Asturleonesa de Amigos do Camiño de Santiago ( C/Adolfo Pousada  Nº 3), mentres que a credencial pódese obter nos albergues de León (como o das  Carbajalas). Funciona igual que a credencial de peregrino xacobea, que por certo tamén nos vale para facer o Camiño de San Salvador.

Etapas do Camiño de San Salvador (de León a Oviedo)

• León – La Robla (27 km)
• La Robla –  Buiza (15 km)
• Buiza –  Pajares (27 km)
• Pajares – Pola de  Lena (27,5 km)
• Pola de  Lena – Oviedo (32 km)