Miño

Mesón Vidal ©Street View

O centro da poboación presenta un puñado de opcións á hora de deterse a almorzar ou comer. Sen desviarse da senda, o peregrino topa co mesón Vidal (Real, 21), especializado en paella e tapas variadas, cun menú do día por 8 euros. Uns pasos máis adiante, no entroncamento coa avenida principal, atópase a pulpeira A Tasca e o restaurante-bar Bellavista, de prezos alcanzables.

Para degustar cociña de mercado será unha boa elección achegarse aos fogóns do restaurante O Cancelo, uns centos de metros afastado do itinerario, próximo ao porto deportivo e cunha excelente panorámica da praia pequena e a ría.

De copas

Co rexurdir estival, os locais nocturnos da vila soan con máis forza. Son poucos e repartidos en distintas rúas do centro urbano. O pub Tronko (rúa Cobo); o Quercus e o Bohemia (próximos á praza do Concello); o pub Area (na estrada da praia); o Pukis e a incombustible discoteca Pisces, ambos os locais na rúa Raxel.