Mos

Pazo de Mos / Fotografía de Xoán Carlos Gil

 Conta con máis de 15.000 habitantes, polo que se trata dun municipio con multitude de servizos para o camiñante, coa característica destacable de estar moi dispersos, xa que o concello carece dun centro urbano propiamente, habendo núcleos de poboación densos nas zonas de Puxeiros ou Sanguiñeda.

O peregrino debe ter en conta que tras deixar atrás a área urbana que une O Porriño e Mos non volverá atoparse cunha zona de servizos ata chegar a Redondela, posto que a ruta neste concello atravesa sobre todo áreas industriais e algunha zona verde. O municipio conta con abundantes restos arqueolóxicos, entre os que cabe destacar o Campo de Mámoas e a Pedra Cabaleira.

Despois destes poboados prehistóricos documentados, non hai máis datos ata a romanización. Desa época queda constancia do paso da vía romana que discorría ata Braga, en Portugal. Mos era coñecida a mediados do século XIII co nome de Molis. As súas parroquias estaban distribuídas orixinalmente en tres xurisdicións pertencentes á antiga provincia de Tui. Mos empezou a utilizar o título de vila desde o último terzo do século XVII ata principios do XIX.

Se o visitante ten a fortuna de visitar Mos no mes de agosto debe facer coincidir o seu calendario para que o segundo fin de semana do mes discorra neste municipio. É nesa data cando se celebra a tradicional Festa da Prehistoria, organizada pola asociación cultural do mesmo nome.

É a única cita deste tipo en Galicia e foi pioneira en España. Organízase desde o ano 2002 e ten lugar no parque da Penacova, onde se organizan talleres, visionados de curtos, representacións e outras actividades. Os participantes agrúpanse por tribos, constrúen cabanas e teñen competicións entre eles. Para máis información pódese consultar a web da festa.