O Grove

Restaurante Beiramar ©Street View

O Grove presume de mariscos e peixes.

Manxares

Non será a opción máis económica para o peregrino, pero, obviamente, si a recomendación para calquera visitante. Nas inmediacións da zona portuaria a oferta é amplísima. Desde o almorzo. Os mesóns, bares e restaurantes dispostos na avenida de Beiramar e os arredores do consistorio ofrecen menús variados, non só de produtos do mar, senón tamén propostas a prezos máis axustados.

Considerado o paraíso do marisco, é mester paladear ostras, nécoras, centolas, percebes e berberechos, ou peixes como sardiñas, xurelo, xarda, linguado, rodaballo, robalizas e douradas. Acompañados por produtos das hortas do Salnés. E o viño... Albariño ou Barrantes.

O restaurante Beiramar (avenida Beiramar, 30) é unha boa opción para degustar produtos frescos do mar, elaborados con esmero e nun comedor con vistas ao porto do Grove.

Na mesma zona atópase o restaurante-marisquería Temón (avenida Beiramar, 14), igualmente destacable pola preparación e presentación dos seus pratos. E un dos de máis renome é o restaurante Culler de Pau (rúa Reboredo, 73), que ostenta unha estrela Michelín. Para os que busquen outro tipo de cociña, o restaurante pizzería María Aguiño (Pablo Iglesias, 26) fundamenta a súa carta en especialidades de cociña tradicional italiana, acompañada por unha ampla carta de viños.