Sobrado

Sobrado ©Panoramio / asanloj

As primeiras referencias ao mosteiro de Santa María de Sobrado datan do século X, co nome de San Salvador, cenobio familiar pertencente aos condes de Présaras. En 1142 instálase a Orde de Cister, xa baixo a advocación de Santa María.

É en 1147 cando o Papa Uxío III confirma a súa fundación, iniciando unha etapa de gran actividade relixiosa e económica. Pero tras un período de decadencia, o ano 1498 marca un punto de inflexión e o mosteiro recobra novos bríos.

Sobrado ©Panoramio / asanloj

A partir de entón comezan a construírse os edificios que actualmente conserva o complexo monacal, exemplo do barroco galego, declarado Monumento Histórico Artístico de carácter nacional. A construción da igrexa, obra de Pedro Monteagudo, finaliza nos últimos compases do século XVII e foi consagrada solemnemente no ano 1798.

No conxunto destacan os tres claustros, a saber, o dos Medallóns, o claustro grande e o dos peregrinos, onde se sitúa o albergue. A maxestosa cúpula e as dúas torres da fachada distinguen a arquitectura do cenobio, en cuxo interior sobresaen dous grandes retablos, a capela do Rosario e unha xoia renacentista, a sancristía. Conserva o mosteiro dúas dependencias do edificio primitivo: a sala capitular e a cociña. As visitas en grupo, guiadas por un monxe, pódense concertar no teléfono 981787509.

O horario establecido para as visitas particulares é de 10:00 a 13:00 horas e de 16:30 a 19:30 horas. Outro dos atractivos da localidade é a lagoa. A zona húmida, propiedade do mosteiro cisterciense, ten algunhas especies vexetais e animais moi escasas en Europa.

O acuífero de dez hectáreas, que pode considerarse o nacemento do río Tambre, é de orixe artificial, construído e ideado polos monxes entre 1500 e 1530 coa finalidade de abastecer regadíos, mover muíños e prover de pesca os cenobios. Tras os avatares da desamortización, o mosteiro recuperou a súa propiedade en 1954. Pero desde 1992 a xestión realízaa o grupo de Santiago da Sociedade Galega de Historia Natural (SGHN), con fins educativos.

As festas e feiras

As festas de Sobrado teñen lugar o 29 e 30 de xuño en honra a San Pedro, patrón local. Na vila celébrase unha feira o 27 de cada mes.