Verín

Casa Do Pulpo, Verín ©Street View

O peregrino non achará dificultades para o almorzo, comida, cea ou avituallamento. Xunto ao albergue público, na Casa do Escudo, a heladería Viruxe abre as súas portas ben cedo para ofrecer almorzos. Outra opción, frecuentada polos ciclistas ou os caminantes que seguen o itinerario pola nacional N-525, é facer parada na cafetería da gasolineira, que tamén apura a apertura a primeiras horas.

E para os que prefiran levar o xantar na mochila, a escasos 20 metros do albergue, atópase a tenda de alimentación do barrio de San Lázaro: A Cunquiña. Para comer ou cear, unha boa elección é achegarse ao casco histórico, con locais como o restaurante Lugano (Amaro Refojo, 14); o mesón Vagalume (Rúa Maior, 4) ou o restaurante Venecia (Rúa Lisa, 13). Ou un xantar nas inmediacións dos balnearios e fontes mineiromedicinais, onde se contan media ducia de establecementos hosteleiros.

Nas avenidas de Laza e Luís Espada topará igualmente o romeiro con restaurantes, mesóns e casas de comidas.