Melide

Melide ©Panoramio enrique vazquez

E é que é neste lugar onde conflúen a ruta que procede de Roncesvalles e o Camiño Primitivo, que parte de Oviedo. Chegados ao enclave, os peregrinos intégranse nunha poboación cunha intensa identidade histórica xacobea e cuxas orixes se remontan á época medieval.

No século XIV foi cercada por unhas murallas das que nada restan, así como protexida por un antigo castelo, destruído tralas revoltas irmandiñas (serie de revoltas que tiveron lugar durante o século XV no Reino de Galicia contra a opresión señorial). Esta falta de vestixios, ou os destrozos modernos -como, por exemplo, a calzada romana coa que desembocaba o Camiño Primitivo na vila e que desapareceu no 2002-, non mitigan que Melide sexa unha das localidades, monumentalmente falando, máis interesantes da recta final do Camiño de Santiago.

Varios tesouros artísticos, unidos a un puxante comercio, e á coñecida oferta gastronómica, con excelente pulpo e repostería tradicional, converten esta localidade nunha parada obrigatoria para os caminantes. Para aqueles aos que o camiño non resinta as pernas nin as ganas de pasarlo ben, Melide preséntase, ademais, como un dos enclaves nocturnos con maior puxanza.

Melide vive a súa semana grande entre o 15 e 21 de agosto, nunha celebración en honor a San Roque. Malia que festas en honor a tan popular santo cóntanse por decenas en toda a xeografía galega, as melidenses son as únicas que se celebran no último tramo de ruta xacobea francesa.

Durante esa semana a localidade énchese de actividades culturais e musicais, e a súa poboación chega a triplicarse. Ademais, nunha das xornadas, o casco histórico convértese en escenario das Festa dos Xogos Tradicionais, un certamen que muda as prazas en espazos de xogo e na que os maiores reviven o seu pasado máis lúdico. Xunto a outras festas, como a do 16 de xullo en honor á Virxe do Carmen, na que moitos melidenses protagonizan descalzos unha procesión, ou a do 29 de xuño, en honor a San Pedro, patrón da localidade, o núcleo tamén cobra protagonismo en setembro.

O segundo domingo dese mes celébrase a Festa de San Caralampio, tamén coñecida como a festa dos borrachos, na que se rende unha particular ofrenda a Baco. Os devotos da celebración entregan a súa alma á divinidad do viño e inundan desde primeira hora os bares e tabernas da localidade sen máis ánimo que o de manter latente a festa máis espontánea, atrevida e descarada de Melide.