Frómista

Fotos cedidas por la Diputación de Palencia

Esta pequena localidade xacobea, que xa no Códice Calixtino aparecía como fin da sexta etapa, sorprenderá a máis dun peregrino polos seus soados monumentos, como a igrexa de San Martín, auténtico fito do románico, e pola canle de Castela, destacada obra de enxeñería da Ilustración, que recibirá aos romeus á entrada ao municipio.

O enclave, a pesar de non superar os 1.000 habitantes, si é un dos máis populosos da contorna e un dos que conta na zona con maior infraestrutura para descansar. Terra de cereais, algo que xa suxire o seu propio nome (frumentum: ‘trigo’), os distintos mesóns recompensan aos camiñantes con pratos típicos casteláns e co xa clásico mamote.

Na localidade os peregrinos poderán admirar unha estatua que representa a un frade á proa dunha embarcación, algo que chama a atención ao situarse nesta Tierra de Campos de secaño, moi afastada ao mar.

A figura evoca a san Telmo (1190-1246), nacido en Frómista e patrón tanto da vila como, en xeral, dos navegantes. Este santo dedicou parte da súa vida a predicar polo norte de España e chegou a Tui (Galicia), onde faleceu e está enterrado.

É por iso polo que Tui, cuxo patrón tamén é san Telmo, e Frómista están irmandadas. San Telmo protagoniza, ademais, unha das grandes festas da localidade. Celébrase o luns seguinte ao luns de Pascua. O acto central é a procesión do Ole, na que os participantes bailan con paus, porras e escobas e cantan varias cancións populares.

Nun ámbito máis xacobeo é rechamante a celebración que vén repetíndose desde o ano 1995 e que é organizada polos integrantes do Centro de Iniciativas Turísticas. O primeiro sábado de setembro a vila festexa o Día do Peregrino. A conmemoración, na que se impoñen cunchas a camiñantes de distintos países, ten lugar na igrexa de San Martín e termina coa degustación de produtos típicos da zona.