Ribadeo

Restaurante A Dorada Do Cantábrico, Ribadeo ©Street View

Como vila turística, Ribadeo conta cunha oferta variada de bares e cafetarías onde almorzar. Dende primeira hora os establecementos do centro abren as súas portas, polo que, de ter pasado a noite no albergue de peregrinos, haberá que desprazarse uns centos de metros para servirse un bo almorzo en calquera dos establecementos dispostos no núcleo urbano.

Para comer, pódese optar polo centro da vila ou desviarse minimamente da ruta para gozar dos restaurantes e mesóns do porto de Porcillán, próximo ao albergue, en establecementos como La Solana (Rúa Antonio Otero, 41); Restaurante Miguel (Porto Deportivo) ou o restaurante O Mariñeiro, no mesmo porto. De dispoñer de tempo abondo como para permitirse unha comida tranquila, paga a pena achegarse ao porto de Rinlo, algo afastado do centro -xa próximo á praia da Catedrais- para ir de viños e tapas polos mesóns e tascas do Alén, A Lira, ou Cortello...

Se o que se busca é un xantar rápido e económico, o centro da vila é unha boa opción, en bares de tapeo como O Trasmallo (Rúa Amando Pérez, 4) ou o Oviedo Bar 2, xunto á igrexa de Santa María.