Dereitos dos peregrinos

@ Vítor Mejuto

A figura do peregrino foi historicamente protexida polas máis altas instancias relixiosas e monárquicas. Salvocondutos, cartas de recomendación e certificados expedidos polas propias casas reais e ordes relixiosas de diversas nacións permitían aos romeus transitar con relativa seguridade o traxecto xacobeo, grazas aos duros castigos para aqueles que inflixisen algunha molestia ou extorsión ao peregrino, nunha época na que as continuas guerras arrasaban o continente europeo. Os favores cara ao penitente relixioso ían máis aló e eximíaselle de portádegos e peaxes, á vez que se obrigaba a prestarlles hospedaxe a cuberto.

Das marchas xacobeas desprendeuse todo un corpo legal para incentivar o fluxo de romeus, en pleno fervor relixioso do catolicismo. Pero as leis e ordenanzas ditadas durante o medievo terían, obviamente, a día de hoxe, nula aplicación, cando non se tornasen textos desatinados de ser transpostos ao marco vixente. Con todo, o pouso acumulado durante séculos de xubileu creou un halo en torno ao camiñante, ao que se lle segue mostrando deferencia, por norma xeral, alá por onde cruza a senda. No entanto, existe a idea infundada de que os peregrinos gozan aínda de prioridade ante unha urxencia sanitaria. Non é así. De feito, non existen protocolos específicos de actuación para a atención urxente de romeus en ningunha das autonomías por onde discorre o Camiño. Ben é certo que, por motivos de funcionalidade e por condescendencia, si se trata de atender o máis rápido posible ao romeu, para que poida así continuar a marcha.

Almorzo, comida e cea en Compostela

Entre os escasos dereitos que conserva o peregrino mantense o de recibir hospitalidade. Aínda que os hospitais atendidos outrora por relixiosos son puras ruínas ou desapareceron. A tradición perdura no Hostal dos Reis Católicos, xunto á catedral de Santiago. Como antiga institución hospitalaria, ofrece aos romeus dez almorzos, dez comidas e dez ceas, totalmente gratuítas, unha vez que teñan presentado a credencial de ter completado o Camiño. A miúdo adóitanas sortear os mesmos romeus que fan cola ante o edificio da praza do Obradoiro.

Rede de albergues

Sexa cal for a ruta elixida para completar o Camiño a Compostela, haberá de ter en conta o peregrino o acceso a albergues públicos. Gozan de privilexio os primeiros en chegar ás súas portas, e impera a figura do romeu pedestre sobre o ciclista ou o xinete. Estes dous últimos deberán ceder a súa praza en caso de completarse a hospedaxe e quedar fóra algún camiñante.

Particular é o caso do Camiño Portugués á súa chegada a Tui, na fronteira entre Galicia e Portugal. Os romeus chegados de terras lusas terán prioridade para acceder a unha cama no albergue tudense.

Seguro do peregrino

O organismo Turismo de Galicia autorizou á compañía Europ Assistance a comercializar un seguro baixo o distintivo de Xacobeo. Trátase dun produto innovador, que dá cobertura a romeus de calquera parte do mundo que realicen o Camiño de Santiago, tanto a pé como en bicicleta.

A asistencia pode contratarse en español, inglés, francés, alemán, italiano e portugués. Contempla apartados como traslado de bicicleta en caso de enfermidade sobrevinda ou accidente, bicicleta de substitución e garantías por perda ou danos de material deportivo. A póliza ofrece a todos os asegurados asistencia en viaxe, como traslado a Santiago en caso de enfermidade ou accidente, servizo de intérprete, prolongación de estancia en hotel, servizo de información, cobertura sanitaria e garantías ante o roubo ou perda de cartóns de crédito. Consulte na web o simulador da aseguradora, ou a través do teléfono 902 197 791.