Mansilla de las Mulas

Santuario de la Virgen de Gracia

Esta antiga localidade amurallada, situada a beiras do río Esla, aínda conserva a súa tradicional vocación hospitalaria e xacobea. De feito, na actualidade, e ante a extensión da etapa que chega a León, Mansilla confírmase como unha boa meta alternativa.

Poboación fundada en 1181 polo rei Fernando II, desta época é o seu recinto amurallado. Ligada ao Camiño, a localidade viviu unha época de esplendor, reflectida na súa actividade arquitectónica, que deu lugar a sete igrexas, unha casa de peregrinos, tres hospitais e dous mosteiros. Neste punto confluían, ademais, e aínda segue a ser así, as dúas variantes que parten desde Calzada de Coto e que discorren practicamente en paralelo.

A Vía Trajana ou Calzada Romana, solitaria e intimista, avanza pola dereita, mentres que o Real Camino Francés, moito máis utilizado que o anterior, faino pola esquerda.

Unha das principais celebracións de Mansilla ten lugar o 25 de xullo, data da festividade de Santiago. Nesa semana teñen lugar as Xornadas Medievais, cun mercado, espectáculos teatrais e as vistosas xustas entre cabaleiros. O domingo anterior ao último de agosto a localidade tamén está de celebración coa Feira do Tomate, o produto típico do núcleo. Realízase un mercado, un concurso e os hostaleiros mostran o produto elaborado nas distintas modalidades. Tamén ten lugar unha tomatina, unha auténtica guerra de tomates. As festas patronais, en honra á Virxe de Gracia, teñen lugar o segundo domingo do mes de setembro.