Centro de Divulgación do Queixo e Mel de Arzúa

Queixo de Arzúa, imaxe de Wikimedia Commons+

En Galicia sabemos poñer en valor o noso patrimonio, e unha parte fundamental da nosa riqueza cultural é a comida. Por iso nace en Arzúa o Centro de Divulgación do Queixo e do Mel, principais atractivos gastronómicos da zona.

Arzúa é parada común en moitas das rutas que levan a Compostela: é a última gran parada antes de Santiago do Camiño Francés, do Primitivo e do Norte. A 39 quilómetros de Santiago, a etapa ata Pedrouzo e a que culmina na catedral parecen o final previsto. Non hai forma máis literal de saborear os meles da vitoria que probar este produto típico de Arzúa.

Mel artesanal, imaxe de Wikimedia Commons

Que podemos ver no Centro de Divulgación do Queixo e do Mel de Arzúa

O Centro de Divulgación do Queixo e do Mel de Arzúa é un lugar creado para promover o consumo destes produtos tradicionais, así como para divulgar a súa elaboración, historia e relación coa cultura galega. Podemos facer unha visita que percorre a evolución da produción de mel e queixo galego, e que culmine cunha degustación.

Pódense facer visitas guiadas con grupos de entre 15 e 25 persoas, para coñecer o museo interpretativo, a biblioteca apícola, a cociña-laboratorio, a tenda e a Cooperativa Erica Mel, con sede no propio centro. É o lugar perfecto para coñecer en profundidade os produtos con Denominación de Orixe Arzúa-Ulloa e Mel de Galicia.

Ademais, este centro organiza obradoiros, charlas e conferencias para profesionais do sector e para afeccionados ao queixo e o mel e, por suposto, degustacións. Este museo enogastronómico é unha visita completa que axuda a gozar aínda máis de produtos de calidade como o queixo e o mel de Arzúa.